bescomatl     David Tuggy T.     
    Textos en mösiehuali     

Yejcamalacutl   


Yejcamalacutl

Ru Marti Méndez

Ini nönca cuiento oquimopubili Ru Marti Méndez Huaxcuatitla quiemi ipa xibitl 1945. Oquimojcuilfi Run Ricardo Pittman hua oquis itech itesis (1954:59)



Whirlwind 

Tlöcatl hua yejcamalacutl



Yejcamalacutl

1. Sie tunali neli omochi ijquiyi. Sente tlöcatl ochöntiya pa caltientli, hua cöni yaja chöntiya seme panuya yejcamalacutl, ipampa ca ompa mojfitiöya Hua seme hua seme tlöcatl quicuölöntiöya, ipampa cuöc yejcamalacutl panuya yaja tlacuajtica, hua ini nönca quitlöltiemiliöya icasfiela hua tlöcatl cachi quicuölöntiöya.

8. Sie tunali quilfia isowa, “Lalibis tiechpasoloa ini nönca yejcamalacutl. Naja ye oniechtlabielmicti. Seme nitlacua ca tlöli, hua öxö para quimatis, nicchiati cöni ca pano hua nicmachietihfis.”

11. Yecuöquinu tlöcatl oquistie, quibicac imachiete, hua oquichiato yejcamalacutl ca quiyöhuac. Tepitzi bejcöjpa quijtac yejcamalacutl ye ompawitz. Yecuöquinu yaja moyejyectlöli imötla machiete oquichix. Cuöc ye asico, quibiquili ixompilielo, hua yaja oquipiehualti ca machiete tlateitequi ca nöbiyö, quitietequi yejcamalacutl Yejcamalacutl uya. Yecuöquino tlöcatl nuyijqui uya ca ichö, hua quilfia isowa, “Öxö ye noquimachietihwi. Belis mustla ayecmo panus.”

18. Pa mustlatica oquijtac ocsajpa ye ompabitz. Tlöcatl ocuitlaquistiquis ca machiete imötla, ocsajpa oquichiato yejcamalacutl. Ocsajpa cuöc panuti ompa, ocasic ca machiete, oquitietec ca nöwiyö, wa yejcamalacutl opanuc ipa. Yecuöquinu tlöcatl uya ca ichö. Yecuöquinu quinunutzato isowa, quilfia, “Öxön quiema. Mustla ayecmo panus, ipampa ye ujpa nicmachietejfia.”

24. Pa mustlatica, ca pan tlajca, ocsajpa oquijtac ye ompabitz. Nocuiel ocuitlaquistiquis, ocsajpa quimachietijfico. Yejcamalacutl opanuc hua yaja uya ca ichö. Quilfia isowa, “Ini nönca belis amo quicocoa. Mustla ocsajpa nicchiati.” Pa mustlatica oquichiato, ocsajpa oquitietec. Yejcamalacutl opanuc hua cachi ca niepa opojpolibito. Yecuöquinu tlöcatl oquijto pa iyulo, “Öxön quiema, ye onicpojpolo.”

31. Yecuöquinu tepitzi bejcöjpa, oquijtac sente tlöcatl hualquis cöni ca opojpolibito yejcamalacutl. Oquijtac iwitz mach cojcotu, mach yesneli, nochi tlatemomotzuli pa ixoyac, pa itzonteco, mach mocuatlajtlapö. Yecuöquino asito itlac, hua oquijto inu nieca tlöcatl aqui tlacuatlajtlapöntli, quilfia öqui ompa quichixtaya, “¿Tli tayi, cuali tlöcatl?” Onöhuat yaja, “Amitla, no nijcatica.”

35. Onöhuat ocsente, quilfia, “Naja seme nipano ca imanie, seme timitztlajpalotiquisa. Hua taja ye quipia yeyi tunali tiniechnömiqui ca machiete hua tiniechmachietijfia. Ye yexpa oticchi. Öxö oticchi ca nöjpa.

39. Xicmajta. Naja seme ca nicö nohfitia. Oncö nicpia nojfi, hua asta inu amo nibitz ipampa naja nicnequi, tlöcamo naja sa nihualtlatitlantli. Hua öxö xiquijta, ma ticchihuacö ocsente. Taja tiyös notequipa, hua naja nocöwas motequipa. San quieni ca tiyöya taja pa mochö, ijquiu niyes naja nuyijqui para ticmatis tli tiecoco.” Yecüoquinu tlöcatl onöhuat, oquijto, “Cuali.” Hua yejcamalacutl onohuat, “Cuali, xibiya, xicmatiti.”

46. Yecuöquinu tlöcatl omiejtie, uya cöni ca hualquis ocsente. Cuöc asito cöni onquis, ye ompa omocuic yejcamalacutl hua ye uya. Yecuöquinu inu tlöcatl tli omocö itequipa ocsente uya ca pan chöntli, asito calijtic. Sa nima sohuatl oquilfi, “Xomotlacualtiqui.” Yaja quijtoöya belis yaja inömic. Yecuöquinu oquijto tlöcatl, “Amo nicnequi nitlacuas.” Hua ijquiu oquichi por miac tunali.

52. Cachi cuöc ye hualös inu ocsente tli uya itequipa, quilfia sohuatl, “Xiquijta. Naja amo nitlacua ipampa notlacual amo yaja ini, tlöcamo ma nicchihua tli ipampa niechhualtitlanqui. Hua asta inu ma timitzilfi amo naja nimonömic nicaca, ipampa monömic notequipa uya.

57. Yecuöquinu quiemi ca pan tlajca oquijtaqui yejcamalacutl ompabitz. Yecuöquinu ini nönca tlöcatl oquilfi sohuatl, “Ye ompabitz monömic. Hua öxö naja niyös.” Yecuöquinu asico yejcamalacutl, hua sa opanuc. Moquetzato asta cöni opojpoli ocsente. Yecuöquinu hualquis ohuala ca ichö hua oquijtaqui mach yehcohcotu, mach moyectetzötzayo, mach mocuatlajtlapö, mach moyetzojtzopini pa ixöyac, pa nochi icuierpo.

63. Yecuöquinu oquilfi ocsente, “¿Quieni ca oticmat? Cuali inu tequitl?” Oquijto yaja, “Amo. Ipampa mös ijtic ötlactli notebejfitectibitz, mös ca bitztli, ca cuajme, ca teme, ca tepietl, ca sajcanopalitl, ca nochi tli onca notlölmojmutlatibitz. ipampaju öxö lalibis niechcojcucoa nocuierpo.” Yecuöquinu oquijto ocsente, “Cuali. Öxö ye oticmatito tlin tiecoco. Öxön quiema ayecmo quiema tiquisas ca machiete hua ticmachietijfis yejyecatl.” Oquijto yaja, “Ayecmo.” Yecuöquinu oquijto ocsente, “Öxö naja ma nibiya.” Yecuöquinu omiejtie, ye uya.

71. Yecuöquinu tlöcatl quilfia isohua, “Melöhuac amo cuali tli onicchi. Öxö xiniechijta quieni nibitz. Mach niyehcojcotu sampor ipampa nicmachietejfi yejcamalacutl.” Sohuatl oquijto, “Naja niquijtoöya tejuatzi oncö timobetztica.” Oquijto tlöcatl, “Amo naja.” Oquijto sohuatl, “Naja nictlamacaya inu nieca tlöcatl hua ayic oquinec tlacuös. Cachi cuöc ye tihualmobicas, ye ixmantiti oniechilfi, “Naja amo nimonömic, tlöcamo sa onocö itequipa monömic. Yaja belaja monömic öxö asico.”

79. Yecuöquinu tlöcatl oquijto, “¿Tli ticnequis? Sampor ipampa notlajtlacul oniya nicmatito tlin tiecoco hua tlin tietunie. Naja niquijtoöya belis ini nönca yejcamalacutl amo tlocanemi, cachi öxö ye nicualmat. Tlacaso ini yejcamalacutl tlöcanemi. Hua öxö ayecmo quiema nicmachietijfis, ipampa yaja tlacaso lalibis tli ipa mochihua. Tlacaso yaja mös ijtic ötlactli, mös bitztli, ca teme, ca cuajme, ca tepieme, hua ca nochi sösantli motlajtlöcamutlatibitz. Lalibis tietlöocolti, hua lalibis niechtlöocoltia, hua naja nuyijqui notlöocoltia. ipampa yaja ye quipia amo machia quiejquich xibitl ijquiu quichijtinemi. Tlö naja sa quiejquich tunali nononya, ijquiyi nopa hualmochi, xöyaja porube.”

89. Yecuöquinu tlöcatl oquijto, “Öxö notlölis nitequitis. Ma sa nihualpajti, niyös pa totlöl, nitlapojpohuati para nictucas tlauli.

91. Pa quiejquich tunali, cuöc yaja ye opajtic, uya otequitito. Tlapojpohuato cöni itlöl. Cöni itlöl lalibis ca cuajcamac oyeya, bitztli, sajcanopalitl, nochi sösantli tli re cuajme, hua yaja oquijto, “Sa tzitziquitzi nicpojpohuas ipampa ini nönca tlöli lalibis pitzotic. Belis ayic nijcuajtlapus.”

95. Cuöc tepitzi bejcöjpa, tlin ura yejcamalacutl pöpano, oquijtac yejcamalutl ye ompabitz ca cöni yaja cuajtlapojtöya. Yecuöquinu asico yejcamalacutl sa sie trepiente ocajcoc nochi cuajme. Oyectlachipö cöni nieca tlöcatl tlapojputöya. Yecuöquinu yejcamalcutl oquilfi tlöcatl, “Nönca tlöli. Xictuca tli ticnequis, hua quiemaniyö tonömiqui.”

101. Yecuöquinu yejcamalacutl uya hua nuyijqui tlöcatl uya ca ichö. Oquipubilito isohua quieni yejcamalacutl otlapojpujtie cöni itlöl. Hua oquilfitie quiemaniyö tonömiqui. Pa quiejquich tunali tlöcatl oquitucato.

104. Hua nuyijqui yaja opie mococoa. Neli itunal ayecmo quipiaya, hua ijquiu ipa omochi asta senamo omiquico.






Moneki xomomachiticö

Números tlī mojta yabi san quieni ca niesi itech Pittman (1954)

Dibujo tli nicö niesi ibitz de “Arte para la Alfabetización en México”, ihuöxca Instituto Lingüístico de Verano. Yejua quicajcöhua öqui quinequi ma cusörucö.

Regresar a la página principal de David Tuggy