Versión en español English version Deutsche Version

Kenika omochantijkej
nikan Kuentepek
detalle de la pirámide de Xochicalco
cerros de Cuentepec

Kijtoua sente leyenda nin tetlanonotzaj nikan Kuentepek, nin tlakaj ochantiyaj kachto ompa tlapouatzian kampa ka non atejtetl kikuitiaj Tembembe:


“Kachto youejka nin chantilistle Kuentepek oktaya kampa ka kalaki non tonale. Nin nikan tichantij Kuentepek tikuitiaj Tlajtepasole, mas sekej kikuitiaj Kuentepetzin.

Kikuitiaj Tlajtepasole por paka sente kale tlachijtle ika tepamitl. Uan kijtouaj yeskia tiopantle. Okichijchijkej non tepamitl non ochantiyaj ompa.


¿Tleka amo ompa ka axkan Kuentepek? Kijtouaj sente tlakatl ochantiya ompa Kuentepetzin oitokaya Sebastián, uan se tonale omochantiko kampa axkan itoka Kuentepek. Kampa axkan ka Kuentepek miekej tlamemelmej katej, uan Kuentepek mokaua nin okse tlamemele kampa ka kisa non tonale uan Kuentepetzin mokaua kane oksektlapatl kampa ka kalaki non tonale. Sekin tlakaj kijtouaj kanikan omochantiko Sebastián, por kache tlaueyika kanikan uan kache tlakualkan. Oksekin kijtouaj omochantiko kanikan por otlauelitak. Uan oksekin kijtouaj omochantiko kanikan por yokimatiya la miekej tlakaj mochiuaskej, uan amo onakiskiyaj nochtin non tlakaj ompa Kuentepetzin. Non ochantiyaj Kuentepetzin oualayaj okanayaj non tlakatl itoka Sebastián kuak omochantikoj kanikan Kuentepek. Ompa okualtokakej inochtin non tlakaj non ompa ochantiyaj Kuentepetzin. Uan opejkej mochantiaj kampa axkan itoka Kuentepek.


Ompa Tlajtepasole iteuan ochantiya sente tlakatl oitokaya Miguel. Uan satepan iteuan ouala. Kijtouaj kiyon ka opejkej mochantiaj nikan kampa nin tichantij.

Bailarines en la feria

Axkan nin Sebastián uan nin Miguel kimpiaj ke xantojmej, uan ipan ual se xiuitl kinchiuiliaj infiesta. Nin Sebastián kichiuiliaj ifiesta ka ipan enero. Uan nin Miguel kichiuiliaj ka ipan septiembre.


Kampa axkan Tlajtepasole miek tlakaj ompa tokaj uan la tlamochiua.”



—Inin leyenda otetlanonotz sente tlakatl tlajtlatoua Nahuatl nikan ichan Kuentepek uan okichijchi inon Elke Müller.