Paawisi anga Akami

(The Curassow and the Grey Trumpeter)


We, da sowtu a sowtu foo de a busi. Pikin wan anga gaan wan. Moi wan anga takuu wan. Baaka wan anga weti wan. Ala sowtu kololu de.

We anga ala fa den de a busi anda enke a wan, toku na paitei paitei den de.

We, di den de paitei paitei, da Akami na wan paitei, Paawisi na wan paitei.

Ma den e waka switi anga den seefi. Den e pee, e dansi, e nyan, e poolo fa den wani. Da na so den be de.

We, anga ala fa den e pee e dansi e poolo de, den e wooko tu. We na pe den de e wooko de, ne buuya kon a ini. Te fu kaba, ne gaan kwali kon.

We, te kwali kon a ini wan sani, da baka fu dati na feti o kon.

Ne i si Paawisi anga Akami di be e pee e dansi e poolo e wooko so moi moi e gi switi toli, piisii fasi, kwali te den feti.

Den feti go den feti kon. Paawisi diki Akami humm! a towe en go a ini a faya fei. Ala en baka weti, faan! anga asisi.

Paawisi taki: “Ai boi!”

Akami opo fubb! a kisi Paawisi hamm! a tyai en baalla! te na a faya, a sutu en mofu a ini dyu! nyaan! Paawisi mofu losi. Paawisi mofu lebi nyaan.

Paawisi taki: “Mi ná abi toobi winsi i sutu mi mofu a ini a faya, toku mi towe yu a ini a asisi weti i baka.

Akami taki: “Weeno, mi baka weti. Ma mi ná a' bisi, mi ná a' bisi. Ma luku de, i mofu pii lebi nyaan.”

Da na so a de. Ne den naki paati.

We da Akami anga Paawisi sama wini? Fa den wooko de, fa den feti de, ondi fu den di wini? Paawisi á wini. Bika saide? Bika Akami baka weti, a toon moi gi en. Paawisi mofu kon lebi nyaan.

We, da Paawisi mofu kon lebi, a toon moi gi en tu. A toon wan nyun modeli. Ala den tu wini makandii.

Da na so a waka. Kwolon! U tapu de.