Wan Onti Toli


Den tu baala, wan mama meke dii pikin, tu baala anga wan sisa. Da den abi angii. Neen den o go a onti. Neen den tu baala go a onti, di den waka teee den go doo a pe wan gaan bigi siton de. A di den luku na a siton baka, neen den si wan bofoo, didon leti na a siton baka. Ne a gaan baala taki, di de anga a goni, ne a taki, en sa sutu a siton, boo go kii a bofoo. En sa sutu a siton da a kuguu boo a siton go kii a bofoo.

Ne a taki,“Efi i sutu a siton, boo go kii a bofoo, da mi sa doo na a kuguu olo go teke a bofoo tyai kon.

Ne a sutu en kpoow, kuguu, gadyaa! A bofoo dede. A pasa na kuguu olo, go teke a bofoo, ali tyai kon towe a pe den taampu. Neen den koti bofoo, koti en te a kaba, bei poti a mutete, tyai, te den go doo osu, taki, “U doo.”

Taki, “Oo sisa u kon.”
Taki, “Oo di u kon fa u waka?”
Taki, “Oo u kii wan bofoo.”
Taki,“Oo u si a bofoo lebi de ya? Boli a lebi poti ya gi u, i á si a de a tafaa de? U go na a tafaa go luku, na a bofoo di u kii anda. Ne en lebi mi boli poti na a tafaa de.”

Da den tu baala, den go luku den taki,“Oho ai a boli en tuu. Ooo.” Neen den nyan. Neen den nyan te den kaa si den bee fuu.

Neen a sa akisi taki, akisi ala sama taki,“Den tu baala, di sutu a bofoo, boo a siton kisi en anga a di tyai en na a kuguu olo kon, anga a sisa, di de a osu, boli en, a lebi puu gi den, den nyan, ondi na a moo koni man?
Dati mi akisi. Efu u si ondi na a moo koni man, wee, ala fa, a wooko fu den du, a sutu a siton go kisi a bofoo. A tyai en a gaan bofoo fu tyai en pasa wan kuguu olo kon. Ma a sisa, á be de a ini a sani. A de te a osu di den go doo, a boli a bofoo, lebi puu gi den, den nyan, da na a sisa moo koni.